Die Gautengse department van Gesondheid het ‘n slagpale in Pretoria gesluit na vleismonsters van dié slagpale positief getoets het vir die Listeriose bakterie. Die slagpale mag nie enige produkte verkoop tot hulle aan die vereistes van die departement voldoen nie. Dit sluit in dat die bron van die organisme bepaal word, ontsmetting van die perseel plaasvind en monsters van die werksoppervlaktes en water voor en na ontsmetting gedoen word.
Vroeër vanjaar het die Nasionale Departement van Gesondheid ‘n uitbraak van Listeriose aangekondig na ten minste 365 gevalle van dié toestand en 28 sterfgevalle aangemeld is.
Die departement van Gesondheid het die afgelope tyd hard gewerk om die bron van die uitbraak vas te stel. Na ‘n pasiënt onlangs met die toestand gediagnoseer is, kon die department die bron van die besmette vleis na die betrokke slagpale in Pretoria naspoor.
Die Gautengse Department van Gesondheid het ook monsters ook aan die “National Institute for communicalble Diseases (NICD)” gestuur vir verdere ontleding en analise.
Die department het ook inwoners van Pretoria gevra om hul volle samewerking vir amptenare van die department terwyl verdere ondersoeke in die gemeenskapps gedoen word.
Lees meer hieronder oor Listeriose
Wat is Listeriose?
Listeriose is ‘n ernstige en potensieël dodelike infeksie wat deur die Listeria bakterie veroorsaak word. Hierdie bakterie word veral gevind in grond en besmette water, pluimvee en kudde diere en kan dus daarom in ongepasteuriseerde melk en vleisprodukte voorkom. Dit kan ook deur rou groente en vrugte wat besmet is versprei word.
Die infeksie het tipies gastro-intestinale klagtes soos naarheid, braking, diarree, buikpyn. Dit kan ook “griep-agtige” simptome soos lyfseer en koors veroorsaak.
Is dit gevaarlik?
Listeria infeksie is potensieël dodelik in ouer mense en jong kinders en babas, mense met ingekorte immuunsisteme (soos byvoorbeeld HIV positiewe mense) en swanger vroue. In die meeste gesonde mense is listeria infeksie self beperkend en is daar geen ernstige komplikasies nie behalwe vir ongemak en glad nie lekker voel nie. Dít gesê, moet die toestand nie ligtelik opgeneem word nie! As jy wel simptome ervaar, is dit belangrik om tóg ondersoek te word aangesien die infeksie vinnig kan versprei en ernstige gevolge kan hê.
Waarvoor moet jy op die uitkyk wees?
Simptome kan vinnig ontstaan – binne 9 tot 48 uur na infeksie, maar dit kan selfs tot 30 dae neem voor simptome verskyn. Tipies is die volgende teenwoordig: koors, diarree, naarheid en braking, buikongemak,erge lyfseer. Kyk ook uit vir nekstyfheid en verwarring. Baie mense kan selfs die simptome met lugweginfeksie simptome verwar.
Hoe word dit gediagnoseer?
Indien jou dokter ‘n sterk vermoede het dat jy moontlik listeria-infeksie kan hê, sal hy/sy sekere bloedtoetse aanvra om vir die teenwoordigheid van die organisme te soek, en om dit te bevestig.
(Let wel, hierdie toetse word nie gewoonlik roetine-weg aangevra nie.)
Kan dit behandel word?
In die meeste gevalle is die toestand self-beperkend en is slegs ondersteunende behandeling nodig. Genoegsame vloeistofinname, en kosse soos brood, rys, piesang en appels kan die diarree onder beheer hou. Behandeling sal deur jou dokter begin word indien dit nodig is. In meer ernstige gevalle, swanger vroue, ouer mense en kinders asook mense wat moontlik komplikasies van die infeksie het, word antibiotika gebruik om die infeksie te behandel. Onthou, as jy simptome ervaar is dit belangrik dat jou dokter jou ondersoek.
Hoekom is dit gevaarlik?
Listeria infeksie kan ernstige nagevolge soos breinvliesontsteking, hartspierinfeksie, septisemie (ernstige bloedstroom infeksie) hê. In swanger vroue kan dit voortydse kraam en selfs miskrame veroorsaak. Met erge diarree kan ontwatering volg. Veral kinders ontwater vinnnig. Dit is daarom belangrik om notisie te neem van simptome en vroegtydig daarna te laat kyk.
Is daar iets wat mens kan doen om dit te voorkom?
Goeie higiëne is altyd die beste begin punt- veral handwas. Kook alle voedsels deeglik, en was alle groente en vrugte behoorlik af voor jy dit eet. Gebruik gepasteuriseerde produkte. Hou gaar en rou vleise in verskillende houers en maak seker voedsel en water kom van betroubare bronne.
Dit is belangrik om vroegtydig op te tree as jy moontlike infeksie vermoed. Hou veral kinders dop. As jy twyfel, besoek jou dokter of naaste hospitaal. Dit is ook belangrik om te onthou dat, al het jy baie van of al die simptome, dit nie noodwendig Listeriose is nie! Daarom is dit belangrik om jou dokter te besoek as jy siek voel.
Hierdie inligting is slegs vir opvoedkundige doeleindes en moet glad nie gebruik word om self-diagnose te maak nie. Besoek jou dokter vir diagnose en raad.
