Hannelie Jacobs (59), haar dogter Suretha (29) en haar 81-jarige ma, Grietjie van Vuuren, het dapper hul man gestaan en daarin geslaag om die aanvallers op ‘n afstand te hou tot hulp opgedaag het.
Die drie vroue en vier kinders, waaronder ‘n ses-dae-oue baba, was alleen op die plaas in Krokodildrift-Wes toe drie aanvallers kort na 22:00 die vensters van die huis met klippe uitgegooi en die deure en veiligheidsdeure afgebreek het.
“Ek was in die kamer saam met een van die kinders toe die venster agter my in skerwe spat. Ek het gesê hy moet na sy ma toe hardloop. Daar was drie mans en die volgende oomblik het vensters oral in die huis gebreek en hulle het groot klippe na ons gegooi,” het Hannelie aan Kormorant vertel.
“Die rowers het die deur en veiligheidsdeur met ‘n pik oopgekap en in die huis ingekom. Hulle het die pik na Suretha en my ma gegooi. My dogter het gesê ek moet die kinders in die badkamer gaan toesluit. Ek het die kinders gegryp en gehardloop. Suretha het die pik in die hande gekry en die rowers daarmee gestorm. Hulle is uit die huis, maar het weer ingekom. My ma het hulle met pepergas gespuit en Suretha het hulle steeds met die pik gedreig.”
Hannelie het intussen die paniekknoppie gedruk en die vroue kon die rowers afweer tot Monitor Net sekuriteit op die toneel opgedaag het. “Hulp was binne vyf minute daar, maar dit het soos ure gevoel.”
Die verdagtes is deur die sekuriteitsbeamte verras en skote is afgevuur. Hulle het op vlug geslaan. Volgens Hannelie was een van die aanvallers in wit geklee en twee het blou oorpakke met glimstroke aangehad. Lede van die Brits gemeenskapspolisiëringsforum Sektor 1 was kort hierna op die toneel.
Niemand is tydens die aanval beseer nie.
“As dit nie vir Suretha was nie, was ons almal moontlik dood. Sy het ses dae gelede ‘n baba gehad, maar het vir ons almal baklei.”
Dit is nie die eerste keer dat dié dapper vrou haar ouers in ‘n plaasaanval beskerm nie. Die gesin is ‘n paar jaar gelede ook op die plaas aangeval. “Dié nag het ons nie die rowers hoor inkom nie en hulle het my pa in sy bed gekonfronteer. Suretha het hulle met ‘n mes verjaag.”
Die Brits polisie ondersoek die saak en niemand is nog in hegtenis geneem nie.
(Erkenning aan: Kormorant)
