“Ons doen ’n belangrike beroep op die Stad Tshwane, as hoofstad van die land, om Madikizela-Mandela te vereer. Sy het ’n enorme bydrae tot die land gelewer en word nie genoeg daarvoor vereer nie,” het Mabogoane Donderdag by navraag gesê.
Hy sê die EFF het die Tshwane-metro twee opsies gegee: Kruger se standbeeld word óf verskuif na ’n ander plek, of word heeltemal gesloop.
“Ons vra nog altyd dat die standbeeld verwyder word. Dit is ’n belediging vir swart mense. Indien die stad dit nie verwyder nie, sal ons dit self doen, ons het dit al voorheen gedoen.”
Mabogoane sê hulle het in die stadium nie ’n sperdatum vir die stad om die standbeeld te verwyder nie, maar hulle is ernstig oor die saak.
Hy sê dit is deel van die EFF se mandaat om ontslae te raak van alle simbole en standbeelde wat aan apartheid gekoppel is.
Intussen het die VF Plus in ’n verklaring gesê hy distansieer hom van die EFF se versoek dat die standbeeld van Kruger vervang moet word met dié van Madikizela-Mandela.
“ ’n Standbeeld van die voormalige presidentsvrou kan opgerig word, maar nie in die plek van die Kruger-standbeeld nie. Die EFF se argument dat Kruger ’n apartheidsikoon was, is nie korrek nie. Die ware feite is dat hy ’n vryheidstryder teen die Britse kolonialisme was,” lui dié verklaring.
Elke standbeeld moet egter op meriete oorweeg word. Gemeenskappe behoort sensitief te wees vir mekaar se simboliese ruimtes.
“Die VF Plus sal met ’n proses begin om die ware geskiedenis van Kruger bekend te maak, en sodoende wys waarom sy standbeeld Kerkplein hoort en daar moet bly.”
Dr. Danie Langner, besturende direkteur van die Federasie van Afrikaanse Kultuurvereniginge (FAK), sê die FAK is in beginsel teen die skuif van standbeelde gekant.
“Elke standbeeld moet egter op meriete oorweeg word. Gemeenskappe behoort sensitief te wees vir mekaar se simboliese ruimtes.”
Langner sê die standbeeld van Kruger is al verskuif, van die Pretoriase treinstasie na Kerkplein in 1954. Hy sê egter die demografie van die Pretoriase middestad moet in dié geval ook in ag geneem word. “Dit kan nie ontken word dat die meerderheid inwoners van Pretoria se middestad eerder in aanvoeling met Madikizela-Mandela sal wees as met Kruger nie. Vanweë Kruger se betrokkenheid by die Anglo-Boereoorlog en omdat hy as 12-jarige seun die Groot Trek meegemaak het, kan die Voortrekkermonument as moontlike alternatief vir sy standbeeld dien indien die beeld wel verskuif moet word.”
Die Tshwane-metro kon nie onmiddellik kommentaar lewer nie.
Netwerk 24
