Kabeldiewe wat derduisende rande se skade in die stad aangerig het deur lamppale af te saag, die kabels uit te trek en dit dan te verkoop se inkomste gaan drasties afneem.
Dit nadat die Tshwane-metro besluit het om die lamppale, wat aanhoudend in Es’kia Mphahlelerylaan (voorheen DF Malan-rylaan) afgesaag word, met betonpale te vervang.
Volgens Elmarie Linde, raadslid van wyk 54, het die munisipaliteit tot die besef gekom dat dit nie gaan help om elke keer weer gewone lamppale in te sit nie omdat kabeldiewe eenvoudig net weer sal toeslaan.
“Hulle het in Atteridgeville begin met die betonpale en toe gesien hoe uitstekend dit daar werk. Dit is ’n langtermynoplossing wat ook goedkoper uitwerk as die gewone pale,” sê Linde.
Volgens haar het dit sowat R9 500 gekos om ’n gewone lamppaal te vervang as alles ingereken word.
“Die betonpale kos egter tussen R7 000 en R8 000 per paal en spaar ons op die duur baie.”
Sy verduidelik verder dat die betonpale sowat 2 m diep in die grond geplant word en dat daar ook ongeveer 1 m² se beton om die paal gegiet word om dit bestand teen diefstal te maak.
Daar gaan binne die volgende ses weke 74 van hierdie betonpale geplant word.
Volgens Linde hoop hulle om binnekort van hierdie betonligte ook in die Wonderboompoort te hê.
“Dit is verskriklik gevaarlik om in die aande daar te ry omdat die kabeldiewe ook daar toeslaan op die gewone straatlige,” sê Linde.
Die Tshwane-metro se beleid vir openbare deelname bepaal ook dat die inwoners van die wyk eerste keuse moet hê om aan ’n kapitaalprojek in ’n spesifieke wyk te werk.
“Die projek strek ook wyk 54 en ’n gedeelte van wyk een en daarom het ons mense vanuit dié twee wyke gekry om aan die projek te werk. Werkskepping is vir ons ’n prioriteit en dit is wonderlik om te sien hoe hard hierdie inwoners werk,” sê Linde
