Hopenlik hou ouers dikwels hul kinders se gebruik van die sosiale media fyn dop, maar hulle moet ook kyk na hul eie plasings, waarsku navorsers in ʼn nuwe opname.
Deesdae word daar feitlik van ouers verwag om gereeld foto’s van hul kinders aanlyn te plaas om vriende en familie op die hoogte te hou van wat hulle doen, maar dit kan negatiewe ─ en selfs angswekkende ─ gevolge hê, volgens die navorsers.
“Dis alles baie nuut. Ons ouers het nie hiermee te doen gehad nie,” sê dr. Bahareh Keith, ʼn pediatriese assistent by die Universiteit van Florida se College of Medicine in Gainesville.
Voor die koms van sosiale media kon ouers hul kinders in die verleentheid stel deur ou fotoalbums te wys. Nou los die dinge wat ouers aanlyn openbaar ─ sommige goed, sommige nie so goed nie ─ ʼn blywende “digitale voetspoor”, verduidelik Keith.
Hierdie digitale voetspore is besig om die norm te word: studies het getoon dat 92 persent van 2-jarige kinders in die Verenigde State ʼn aanlynteenwoordigheid het, en ongeveer een-derde maak binne 24 uur na hul geboorte hul eerste verskyning op sosiale media, sê die navorsers.
Soms duik daardie ou, verleë foto wat ʼn ouer geneem het op Facebook op as ʼn “herinnering”. Maar op ander tye verskyn ʼn kind se persoonlike inligting ─ soos gedragsprobleme ─ in die openbare domein, sê Keith.
En dit, sê sy, kan sielkundige gevolge vir kinders hê.
Meer sinister is die feit dat ouers se plasings ook onopsetlik inligting aan identiteitsdiewe of selfs pedofiele gee.
Volgens Keith is daar nog min navorsing oor hierdie kwessie gedoen, waarskynlik omdat dit so nuut is. Haar span het ʼn oorsig gedoen van die mediese en regsliteratuur oor die onderwerp en het met riglyne vir ouers vorendag gekom.
Vir die huidige gee sy raad oor hoe om verstandig te werk te gaan met jou plasings:
Moet nooit foto’s van jou kinders in “enige staat van ontkleding” deel nie. Wees versigtig met plasings wat sê presies waar jou kind is. As jy aanlyn soek na hulp met jou kind se gedragsprobleme, deel die inligting anoniem.
Verder raai sy ouers aan om seker te maak dat hulle die privaatheidsbeleid verstaan van al die webwerwe wat hulle gebruik.
Bron: HealthDay
