Jy is ’n moordenaar! Ons gaan jou doodmaak, jou moordenaar! -Dít was die woorde van ’n groep mense wat Maandagoggend voor ’n huis in Lynnwoodrif, Pretoria, bymekaargekom het nadat die huiseienaar Saterdag twee rowers by dié huis doodgeskiet het.
Die huiseienaar het intussen Maandag ’n klag van intimidasie by die Garsfontein-polisiekantoor ingedien.
Luidens sy verklaring aan die polisie het sy tuinwerker hom omstreeks 10:00 geroep en gesê daar is “baie mense voor die hek wat lawaai” en dat hy moet gaan ondersoek instel.
Buite sy hek het hy tien mense gesien, onder wie vier vroue.
Intussen het ’n veiligheidsbeampte van Interactive Security op die toneel opgedaag.
Die mense het op die huiseienaar geskree en hom ’n moordenaar genoem.
Een vrou het geskree: “Jy is ’n moordenaar! Nou het ons jou adres. Ons sal jou doodmaak, jou moordenaar,” lui die polisieverklaring.
Hy het die veiligheidsbeampte gevra om die polisie te ontbied, waarna die groep mense in hul voertuie gespring en weggery het.
“Ek vrees vir my lewe en vir die veiligheid van my gesin, want die vreemdelinge het gedreig om my dood te maak en gesê hulle weet waar ek woon,” sê hy in die verklaring.
“Ek het niemand rede gegee om my te dreig of my gesin dood te maak nie.”
Dié dreigemente kom nadat die huiseienaar Saterdagmiddag twee rowers doodgeskiet het wat hom en sy gesin in die oprit van hul huis oorval het.
Toe die man en sy gesin tuiskom, was die motorhek oop en daar was ’n onbekende voertuig in die oprit, het kapt. Dave Miller, polisiewoordvoerder, vroeër gesê.
Die man het uit sy voertuig geklim om ondersoek in te stel toe een van die verdagtes in sy voertuig klim.
“Die verdagte het met die voertuig in trurat probeer wegry terwyl die man se gesinslede nog daarin was. Gelukkig het die verdagte teen die oprit se muur vasgery en kon die voertuig dus nie verder ry nie,” sê Miller.
In ’n poging om te vlug het die ander verdagte, wat agter die stuur van hul voertuig was, aanhoudend teen die huiseienaar se voertuig vasgery.
Die man het daarin geslaag om sy gesinslede uit hul voertuig te bevry.
“In die proses het die man die twee verdagtes geskiet,” sê Miller.
Verskeie huishoudelike items wat uit die slagoffers se huis gesteel is, is in die verdagtes se voertuig gevind.
Die polisie stel ondersoek in om vas te stel of die verdagtes se voertuig gesteel is en of hulle met ander misdade verbind kan word, sê Miller.
Die polisie ondersoek tans geen klag teen die huiseienaar nie.
* Netwerk24 het die polisieverklaring ontvang op voorwaarde dat die man en sy gesin se name weerhou word.
Deur: Netwerk 24
