Die leier van die Afrikaner Selfbeskikking Party het sterk tevelde getrek teen die ANC oor die regering se koers met grond onteiening.
Die skokkende onthulling is in die afgelope naweek in die media gemaak dat die ANC bloot ʼn skyn-wetsontwerp oor onteiening sonder vergoeding vir openbare kommentaar gepubliseer het. Die media het openbaar dat Dr Mathole Motshekga van die ANC erken het dat die ANC hierdie skyn-wetsontwerp gepubliseer het sodat dit nie te veel teenkanting veroorsaak voordat die ware wetsontwerp in die parlement ter tafel gelê word nie.
In terme van die ware wetsontwerp sal die howe volgens Motshekga geen bevoegdheid hê om oor die wettigheid van die ANC se beoogde onteienings sonder vergoeding te beslis nie.
Motshekga het verklaar dat die hofproses na die mening van die ANC te lank duur en dat die ANC-regering as verkose regering die finale seggenskap oor onteienings sonder vergoeding moet hê.
Die hele begrip van onteiening sonder vergoeding wat die ANC beoog, is reeds in die gepubliseerde wetsontwerp onwettig in terme van die Volkereg ten spyte van die klousule daarin wat die bepaling van die wettigheid van nul vergoeding vir onteiening in die hande van die howe laat. Hierdie verskuilde wetsontwerp is insgelyks ʼn regsvergryp teen die Volkereg.
Die Afrikaner Selfbeskikking Party sal hierdie onwettige strategie van die ANC, en die onwettige onteiening sonder vergoeding, in welke gedaante ookal, teenstaan met alle middele tot sy beskikking.
