Meeste mense steun swaar op hul elektriese heinings vir veiligheid en vertrou dit blindelings as ‘n “ondeurdringbare” linie, en met reg ook so. Maar hierdie spesifieke item is telkemale, weens verskeie faktore ter sprake, nie aangewese om goeie beskerming te bied teen huisbewoners nie! Mense moet hulle dus nie blindstaar teen ‘n elektriese heining vir “totale” beskerming nie en dit net in samewerking met ander items inspan as toegangsbeheermiddel teen betreders en inbrekers. Hier is ‘n paar redes daarvoor en wenke daaromtrent:
- Elektriese heinings is ‘n taamlike duur item om aan te skaf (en ook in stand te hou)
- Elektriese heinings verg baie instandhouding en sorg, veral as dit aanvanklik swak ge-installeer is. Bossies, takke en blare wat daarmee kontak maak, affekteer die werking daarvan negatief
- Hierdie goed word meestal ondergeskik ge-installeer deur onbevoegde werkers met min Tegniese kennis, ondervinding of opleiding tot hul beskikking
- Dieselfde met ‘doen-dit-self’ stelsels: Heel goeie produkte, maar die installasie deur Jan-Alleman met talle foute in, laat dit gevolglik oop vir eindelose wanwerkings/falings en/of maklike sabotasie of oorkom-taktieke deur kriminele
- Maklike oorkom-tegnieke, sluit in rubbermatjies of komberse, en ook die oorskuif van rubber- of plastiek tuinslang om die kontakalarm te omseil en oor te klim. Ook tou en selfs skoenveters om parte in die stelsel af te trek of af te buig en openinge te laat waardeur/waaroor hulle dan klim
- Swak installasies lei tot talle probleme en vals alarms en eienaars raak naderhand moeg daarvoor en skakel die hele ding af!
- Beurtkrag dreineer die battery/e en beskadig dit sodoende (‘deep-cycling’) waarvoor dit nie ontwerp is nie. Foutiewe batterye lei tot probleme, vals alarms en eindelose “fout”-kondisies op die paneel/sleutelbord
- Dit raak nou algemeen (en hoog-mode) binne “Sekuriteitskomplekse” dat die hekwagte/nagwagte die Sirene van heinings afskakel/isoleer sodat hul kriminele vriende kan oorklim en misdaad, gewoonlik gewapende rooftogte, kan pleeg!
- Gebruik maatskappye met bewese getuigskrifte en personeel met goeie, praktiese ondervinding, om jou installasie vir jou te doen. Onthou: Groot Maatskappye met “flashy” advertensies is nie noodwendig die beste/regte ene nie!
- Elektriese heinings moet ALMAL aan een of ander alarm-sirene gekoppel word om huisbewoners onmiddelik te waarsku! Geen uitsonderings is aanvaarbaar nie! Ideale stelsels is waar dit ook aan jou Reaksiemaatskappy geskakel word, of selfs ‘n SMS-Kommunikator eenheid wat jou vroegtydige waarskuwing kan gee wanneer jy uitstedig is
- Gebruik ALTYD jou elektriese heining in samewerking met goed soos lemmetjiesdraad, buite-beams en CCTV-kameras
- Hou areas onder die heining skoon van gras/bossies (sien foto) en enige nabygeleë struike/bome gereeld gesnoei om enige “aard”-foute, alarms en/of skade aan die stelsel te vermy
- Inspekteer stelsels weekliks vir algemene foute/probleme en ondersoek diesulke heinings deeglik op ‘n 3-maandelikse grondslag vir los hegstukke (“brackets”), stukkende isolators, drade wat begin slap hang, gekorrodeerde of los elektriese konnektors, enige moontlike aardfoute, reën, stof en insekskade, effektiewe batterywerking, ens, ens, ens…
Opsomming: Elektriese heinings is uiters nodig in die stryd teen misdaad, maar moet reg ge-installeer en ook goed onderhou word om hoogs effektief te kan werk. Ongelukkig is dit ‘n taamlike aanvanklike uitgawe, en het ook maandelikse kostes, maar kan en sal genoegsame beskerming verleen indien dit aan bostaande vereistes voldoen.
