Tag: berig

Posted on by — Leave a comment

Motorfietse brul teen Plaasaanvalle by Hartbeespoortdam

Motorfietse brull teen Plaasaanvalle by Hartbeespoortdam

Die lug om Hartbeespoortdam gaan op 16 September 2017 gevul word met die gebrul van motorfietse teen plaasaanvalle.

“Die Nasionale Motorfietsvereniging en sy assosiate gaan die dag fondse insamel om boere en plaaswerkers teen plaasaanvalle te help beskerm. Dié fondse sal tydens Agri SA se kongres in Oktober 2017 aan die Agri Securitas Trustfonds oorhandig word”, sê Ben Stander, voorsitter van die reëlingskomitee.

“Ons as motorfietsentoesiaste kan nie langer terugsit en toesien dat boere en plaaswerkers wat ‘n bate vir ons land is vermoor word, sonder dat ons iets daaraan doen nie. Daarom reël ons die pretdag by die Hartbeespoortdam vakansieoord om fondse in te samel vir die Trustfonds. Ons kan ons vereenselwig met die werk wat die Trustfonds doen om die boerderygemeenskap teen plaasaanvalle te help beskerm en is oortuig daarvan dat die Trustfonds die regte voertuig is om die fondse te ontvang”, sê Piet Jooste, lid van die reëlingskomitee.

Kiewiet Ferreira, waarnemende voorsitter van die Agri Securitas Trustfonds sê dat, “die Trustfonds waardering het vir die welwillendheid van die motorfietsvereniging teenoor die boerderygemeenskap, om hulle by te staan om die huidige misdaadprobleem te help oorkom. Onlangse mediaberigte het weereens die geweld teenoor die boerderygemeenskap op die voorgrond geplaas en daarom is die trustees dankbaar vir die tyd wat professionele mense en lede van die publiek opoffer om boere in hierdie krisistydperk by te staan”.

Lede van die publiek en boere word genooi om te kom deel in die pret wat gedurende die dag aangebied sal word en die poging om fondse in te samel waardeur boere en plaaswerkers beskerm kan word. Daar sal hope vermaak, eet- en drinkgoed beskikbaar wees. Verskeie kunstenaars het hulle dienste gratis beskikbaar gestel om hulle deel by te dra tot die fondsinsamelingsprojek. Almal is welkom om die dag te kom ondersteun en hekke open reeds om 08:00.

Ter afsluiting sê Ben Stander, “dat dit nou lede van die publiek se tyd is om ‘n deel by te dra om ons boere en plaaswerkers te ondersteun, ons kan nie net aanhou praat oor die probleem, nou kan almal iets bydra. Jy kan nie die pretdag misloop nie, onthou dit is vir boere, plaaswerkers en families om hulle te help beskerm teen plaasgeweld. Ons vereenselwig ons ook met die doelstellings van die Agri Securitas Trustfonds en die werk wat hulle doen om die boerderygemeenskap te help beskerm”.

Posted on by — Leave a comment

Groot grondeis in Pretoria teengestaan

Groot grondeis in Pretoria teengestaan

Die sakeregtewaghond AfriSake het onlangs weer ingegryp om ʼn groot grondeis ten opsigte van eiendomme in die ooste van Pretoria teen te staan.

Volgens AfriSake het sy regspan onlangs ’n voorverhoorvergadering oor die Lekhuleni-grondeis by die grondeisehof in Randburg bygewoon.

Armand Greyling, regs- en beleidsontleder by AfriSake, het gesê die voorverhoor het meestal gefokus op die oplos van kwessies wat tydens die verhoor gehanteer sou moes word.

Die verhoor sal waarskynlik later vanjaar begin, het Greyling gesê.

“Dit beteken dat slegs finale beëdigde verklarings geliasseer moet word, aangesien die aangeleentheid gereed is om verhoor te word. AfriSake eis dat die grondeisehof se beslissing dat die Lekhuleni-eis geldig is, tersyde gestel word omdat die administratiewe diskresie in hierdie geval slegs by die grondeisekommissaris berus,” het hy verduidelik.

Greyling meen dit blyk dat hierdie eis opportunisties en soortgelyk is aan die Bakwena ba Mare a Phagole- of Suid-Gauteng-grondeis waarby AfriSake ook aktief betrokke is.

“Ons glo dat die reg sy gang moet gaan wanneer geldige eise ingedien word, maar in dié geval kan ons nie saamstem dat die eis geldig is nie. Die grondeisehof se betrokkenheid in hierdie saak oor die diskresionêre gesag van die grondeisekommissaris blyk ook onvanpas te wees en AfriSake sal alles in sy mag doen om te verseker dat die regte prosedures gevolg word,” het Greyling gesê.

Dié grondeis betrek meer as 500 residensiële eiendomme, nege plase en verskeie skole en besighede. Dit is na bewering deur wyle Victor Lekhuleni ingestel, wat aangevoer het dat hy die leier van die Bakgatla Ba Lekhuleni-stam was. Hy is ná sy dood deur Velaphi Victor Lekhuleni opgevolg.

Volgens AfriSake is die eis na bewering op 21 Oktober 1996 by die grondeisehof ingestel. Ná ’n ondersoek het die kommissie dit op 16 Januarie 2013 duidelik gemaak dat geen eis ingedien is nie en dat die kommissie nie sal voortgaan om die eis te ondersoek nie. Op 8 Augustus 2014 het die grondeisehof dié besluit egter hersien en tersyde gestel.

As die hof se besluit nie tersyde gestel word nie, sal hulle voortgaan om die meriete van die saak te beveg betreffende of enigiemand weens diskriminerende wette met geweld van die eiendom ter sprake verwyder is, het Greyling bygevoeg.

Deur: Maroela Media

Posted on by — Leave a comment

Klasse by Hoёrskool Pretoria-Wes ontwrig oor kleefbroeke

Klasse by Hoёrskool Pretoria-Wes ontwrig oor kleefbroeke

Beamptes van die Gautengse departement van onderwys is Maandag na Hoёrskool Pretoria-Wes ontplooi nadat leerders Vrydag klasse geboikot het omdat hulle eerder noupassende broeke as gewone wyepyp-broeke as deel van hul skooluniform wil dra.

Steve Mabona, woordvoerder van die Gautengse departement van onderwys, het gesê die herrie rondom die skooluniform het begin nadat twee “oproerige leerders” ná ʼn dissiplinêre verhoor vir sewe dae geskors is omdat hulle die skool se kleredragkode oortree het.

Die twee leerders was Donderdag weer terug by die skool waar hulle ander leerders by die skool oortuig het om klasse te ontwrig in ʼn poging om die skool te dwing om hulle toe te laat om spanbroeke, ook bekend as kleefbroeke of sogenaamde skinny pants, te dra.

Die twee leerders het ook ʼn WhatsApp-groep gestig om sodoende ondersteuning vir die saak te werf.

Lede van die leerderraad was aanvanklik nie deel van die WhatsApp-groep nie, maar is ná die departementele beamptes se besoek aan die skool by die groep ingesluit om die gesprekke daarop te monitor.

“Die onderrigbedrywighede by die skool het vandag [Maandag] normaalweg voortgegaan,” het Mabona gesê.

“Die skoolbeheerliggaam het besluit om ʼn vergadering met die ouers van die skool te hou om die saak verder te bespreek. Intussen bly die skool se gedragskode van krag.”

Mabona het gesê dit is “bemoedigend” dat graad 12-leerders Vrydag, ondanks die ontwrigting, toegelaat is om hul voorbereidingseksamen te skryf.

“Die departement veroordeel die leerders se gedrag ten sterkste en doen ʼn beroep op leerders om die beskikbare strukture te gebruik om besware of kommerwekkende kwessies aan te raak eerder as om skoolbedrywighede te ontwrig. Ons doen ʼn beroep op leerders om hulle te weerhou van onwettige betogings, aangesien hul toekoms van
hul skoolloopbaan afhang,” het hy gesê.

Panayaza Lesufi, LUR vir onderwys in Gauteng, het gesê dit is “teleurstellend” dat die departement se tyd en hulpbronne in beslag geneem word deur geringe kwessies wat nie hul prioriteit behoort te wees nie. “Ons fokus is om die gehalte van onderwys te verbeter en ons is nou besig met voorbereidingseksamens en algemene voorbereiding vir matriekeindeksamens.”

Deur: Maroela Media

Posted on by — Leave a comment

AfriForum betoog by Pretoria hofverrigtinge teen dubbele standaarde oor rasvoorvalle

AfriForum betoog by Pretoria hofverrigtinge teen dubbele standaarde oor rasvoorvalle

Lede van die burgerregte-organisasie AfriForum het vanoggend buite die Pretoria-Noordse landdroshof teen die dubbele standaarde betoog waarmee rasvoorvalle in Suid-Afrika hanteer word.

Dié dubbele standaarde behels volgens AfriForum dat wit-op-swart-aanvalle deurlopend aan die groot klok gehang word, terwyl swart-op-wit-aanvalle grootliks geïgnoreer word. Die betoging val saam met die verskyning van twee verdagtes wat Carel Kruger aan die begin van Augustus vanjaar in die Montana-omgewing gewelddadig met ’n baksteen aangeval het. Dié aanval het enkele dae ná die KFC-voorval – óók in die Montana-omgewing – plaasgevind.

Volgens Kallie Kriel, uitvoerende hoof van AfriForum, het sowel die aanval op Kruger as ’n ander geval in die Montana-omgewing toe die ongewapende Carine van Staden in ’n padwoedevoorval geskiet is geensins dieselfde openbare aandag en veroordeling as die KFC-voorval ontvang nie. “Ongelukkig bestaan daar dubbele standaarde rakende die hantering van voorvalle waarby ras betrokke is. Wanneer die slagoffer swart en die aanvaller wit is, word die saak aan die groot klok gehang, terwyl sake soos dié van Kruger en Van Staden grootliks geïgnoreer word,” sê Kriel verder.

Kriel wys daarop dat AfriForum alle voorvalle van geweld veroordeel – ongeag die ras van die slagoffer of aanvaller.

“AfriForum het die KFC-voorval soos baie ander instellings veroordeel, maar wag tot vandag toe dat die minister van polisie, die meerderheid van die media en die sogenaamde ‘black twitter’ die Kruger- en Van Staden-aanval met dieselfde ywer veroordeel as waarmee die geval met die KFC-voorval veroordeel is,” voeg Kriel by.

“Vir solank as wat die samelewing onwillig is om alle voorvalle waarby ras betrokke is oor dieselfde kam te skeer, lewer dit geen bydrae tot die verbetering van rasseverhoudinge nie. Inteendeel: dubbele standaarde veroorsaak verdere polarisasie. Daarom sal AfriForum voortaan deurlopend ʼn beroep doen vir die bevordering van wedersydse erkenning en respek tussen gemeenskappe,” sluit Kriel af.

Posted on by — Leave a comment

Sewe verdagtes word aangekeer in Pretoria ivm motorfietsdiefstalle

Sewe verdagtes word aangekeer in Pretoria ivm motorfietsdiefstalle

Die Pretoriase polisie het sewe verdagtes in hegtenis geneem in verband met ʼn vlaag motorfietsdiefstalle die afgelope tyd.

Kapt. Agnes Huma, woordvoerder van die polisie, het gesê die mans, tussen 25 en 35 jaar oud, is Dinsdag in die vroeë oggendure in Rooihuiskraal in Centurion in hegtenis geneem.

“Die mans se modus operandi was om na bewering in ʼn wit Quantum in die Rooihuiskraal-omgewing rond te ry op soek na motorfietse wat binne of buite persele parkeer is,” het Huma gesê.

“Nadat hulle ʼn spesifieke huis identifiseer het, sou hulle later in die aand terugkeer, die honde vergiftig om toegang te verkry en dan die motorfiets steel.”

Huma het gesê die polisie in samewerking met die gemeenskapspolisiëringsforum en plaaslike veiligheidsmaatskappye het ʼn gesamentlike intelligensie-gedrewe operasie geloods en die Quantum Dinsdag omstreeks 01:30 opgemerk.

“Die polisie het die voertuig voorgekeer en die sewe verdagtes is in hegtenis geneem. Toerusting om by huise in te breek en klapmusse is in hul besit gevind en beslag is daarop gelê.”

Die verdagtes moet binnekort in die hof verskyn op aanklag van die besit van huisbraak-toerusting. Die Wierdabrug-polisie ondersoek die moontlikheid of die verdagtes met ander voorvalle in die gebied verbind kan word.

Die polisie het inwoners gewaarsku om nie waardevolle besittings oop en bloot te laat nie.

Deur: Maroela Media

Posted on by — Leave a comment

Pretoria man word nog ‘n statistiek van taxi geweld na aanval met baksteen

Pretoria man word nog 'n statistiek van taxi geweld na aanval met baksteen

Hulle het geslaan om dood te slaan. Carel Kruger (43) was oortuig daarvan toe die baksteen-houe vir die soveelste keer op hom neerreën.

Selfs toe hy bebloed na twee lede van die Tshwane-metropolisie gehardloop het, een aan die baadjie gegryp en gesmeek het: “Help!” het een van die aanvallers nog ’n hou ingekry.

“Die twee metropolisiemanne het net daar gestaan. Hulle was gewapen, maar het niks gedoen nie.”

Toe vlug Kruger maar tussen die voertuie in Lavenderweg in die noorde van Pretoria in en bel ’n vriend om hulp.
Ander lede van die Tshwane-metropolisie het wel later ingegryp en twee vermeende aanvallers gevang, maar Kruger sê hy gaan klagte indien teen die twee wat volgens hom net gestaan en kyk het hoe hy veg vir sy lewe.

“Ek is kwaad. Omdat ons so moet lewe, dat ek net nog ’n slagoffer is soos duisende ander,” sê hy.

Hy het Vrydagaand net na 19:00 in Lavenderweg gery toe ’n wit taxi bane verwissel en amper reg voor hom inry.

“Ek het getoet en ligte geflikker, toe druk die taxi my bakkie van die pad af. Ek het versnel om voor hom in te kom. Toe ek terug in die pad is, het ek bane verwissel om uit sy pad te kom.”

DIE BESTUURDER VAN DIE WIT TAXI HET MY KARSLEUTEL DEUR DIE VENSTER PROBEER UITTREK. TOE EK KEER, BEGIN HULLE MY DEUR DIE VENSTER TE SLAAN.

Die volgende oomblik het die wit taxi verbygejaag en ’n blou taxi, wat in daardie stadium agter die witte was, reg langs Kruger in.

“Die blou taxi het my ook na die skouer van die pad gedwing, ek het probeer wegkom, maar die blou taxi het my bakkie van agter gestamp.”

Die bakkie se elektronika, het Kruger verduidelik, sny outomaties uit as dit deur ’n sekere impak getref word.

“My bakkie het gestol, die wit taxi het dwarsoor die pad voor my ingetrek en die bloue het reg agter my gestop.

“Drie of vier mans het uit die taxi’s gespring.

“Die bestuurder van die wit taxi het my karsleutel deur die venster probeer uittrek. Toe ek keer, begin hulle my deur die venster te slaan.

“Ek het in die gestoei besef hulle gaan my net hier in my bakkie doodmaak, ek moet wegkom. Met die uitklim het die eerste baksteen my links teen my kop getref.

“Dit was toe asof hulle beurte gemaak het om met die bakstene los te trek. Ek het probeer keer, probeer staande bly.”

Tussen die houe deur het Kruger het twee metropolisielede op die middelmannetjie sien staan.

“Ek het soontoe gehardloop. Terwyl ek met die metropolisielede praat, het een aanvaller my sommer weer met ’n baksteen van agter geslaan. Ek het tussen die twee metrolede geval, besef ek gaan nie hulp kry nie, en tussen die karre ingehardloop”.

Die een aanvaller is agter hom aan, steeds slanende met die baksteen.

“Ek wou net wegkom. Ek het by van die voertuie in die pad probeer hulp kry, maar almal het hul deure gesluit”.
Kruger het verder gevlug, sy foon beetgekry en ’n vriend gebel om hulp.

Die vriend was in ’n rekordtyd daar.

’n Ent verder in die pad was ander metropolisielede.

Húlle het twee van die verdagtes gevang. Kruger weet nie of hulle toevallig daar was en of iemand hulle ontbied het nie.

Kruger wil, as lid van Solidariteit en AfriForum, hulle nader vir regsadvies oor optrede teen die twee metrolede wat nie gehelp het nie.

“Ek is nie wraaksugtig nie. Maar wat as dit met ’n vrou of ’n kleiner man gebeur het? Hulle sou dood gewees het. En dit was tog duidelik wié die slagoffer was!”

* Danny Mahlangu en Modiso Dooka het intussen in die hof verskyn en staan tereg op aanklag van aanranding met die opset om ernstig te beseer.

Hulle is op borgtog van R600 elk vrygelaat en moet weer op 23 Augustus in die hof wees.
** Die Tshwane-metropolisie kon nie vir kommentaar bereik word nie.

Deur: Netwerk 24

Posted on by — Leave a comment

Search intensifies for missing Pretoria businessman,Omar Carrim 76

Search intensifies for missing Pretoria businessman,Omar Carrim 76

Gauteng MEC for Community Safety Sizakele Nkosi-Malobane on Monday met the family of Pretoria businessman Omar Carrim, who went missing after leaving his Home Hyper City shop in the CBD on Thursday last week.

Nkosi-Malobane, with Tshwane West South African Police Services (SAPS) Cluster Commander Maj-Gen Daniel Mtombeni, assured the Carrim family that no stone is being left un-turned in the extensive search for the 76-year-old father of five.

Carrim’s car, a Mercedes-Benz E300, which he was driving at the time, was found torched extensively near the Hennops Road (R511) outside Atteridgeville on Friday.

Anti-crime activist Yusuf Abramjee, who is also spokesperson for the distraught family, said no ransom demand has been made.

“We appeal to the public to come forward with any information. Someone, somewhere, somehow knows something. Omar’s car was found torched. It appears we are dealing with a dangerous syndicate,” said Abramjee.

“The family appeals to the abductors to release Omar unharmed. He is on chronic medication and he has a heart condition.”

Abramjee said the family’s appeal has also been conveyed to Police Minister Fikile Mbalula.

Carrim left his business premise along Pretorius Street in the city centre before 6pm on August 3, heading home. His family became anxious when he did not arrive. He was wearing a navy blue jersey and grey trousers.

For the Pretoria police, Mthombeni also appealed for information which would lead to a breakthrough in the case. He urged community members, with any information, to contact any nearest police station or to call Crime Line.

Posted on by — Leave a comment

Spoorlyn in die weste van Pretoria kry nuwe baaidjie danksy publiek en Transnet

Spoorlyn in die weste van Pretoria opgeruim deur publiek en Transnet

’n Uiterste verwaarloosde spoorlyn wat aan die weste van Pretoria geleë is, het gedurende die week ’n nuwe baadjie gekry. Die spoorlyn wat oor ’n groot gebied in die weste strek was vir ’n geruime tyd ’n groot probleem vir die plaaslike gemeenskap.

Volgens DA-raadslid Elma Nel was die spoorlyn ’n reuse probleem in haar wyk. Sy vertel dat vir die eerste keer was daar goeie samewerking vanaf beide Transnet en die publiek. Nel spreek haar dankbaarheid uit teenoor almal wat ’n handjie bygesit het met die opruimings werk en loof die betrokke partye vir hul bereidwilligheid om te help. Nel beklemtoon dat sy alreeds van die begin van die jaar haar bemoei het met die skoonmaak van die spoorlyn.

Volgens ’n inwoner, net bekend as Sarel, is hy verheug oor die skoonmaaksessie. Sarel vertel dat hy die afgelope 36 jaar in die gebied woon. Hy skryf die oorsaak toe aan onwettige storting wat gereeld plaasvind. Sarel vertel skertsend dat hy enkele dae te vore onwettige storters by die spoorlyn op heterdaad betrap het. Hy het self foto’s van die skuldige partye geneem en vir DA-raadslid Elma Nel aangestuur.

Nel beweer dat die betrokke spoorlyn is ’n groot probleem in die wyk omrede onwettige stortings daar plaasvind en self dwelmmiddels versprei word. Sy het egter langtermyn planne om die gebied meer vriendelik te maak deur ’n speelterrein vir kinders en fietsry-en draf roetes in te rig.

Die skoonmaaksessie by die spoorlyn het reeds Maandagoggend in volle gang begin en teen Woensdag was die betrokke partye goed op dreef.

Posted on by — 1 Comment

Na drie dekades wil Gert van Rooyen se Seun saak heropen

Gert van Rooyen se Seun wil saak heropen

Na bykans drie dekades lig pedofiel Gert van Rooyen se seun vir die eerste keer die sluier oor wat hy beweer op die dag van Gert en sy houvrou Joey Haarhoff se dood gebeur het.

“Daar was nooit ‘n selfmoordpakt tussen my pa en Joey nie,” sê Gerhard in ’n video-opname wat op Facebook geplaas is.

Gerhard het ook nadoodse foto’s van sy pa en Joey op Facebook gelaai.

Hy het kenners uitgedaag om te bepaal dat die paartjie wel selfmoord gepleeg het.

Van Rooyen en Haarhoff het na bewering tienermeisies tussen 1988 en 1990 in Pretoria ontvoer.

In Januarie 1990 is die 16-jarige Joan Booysen ontvoer. Sy kon egter kort daarna uit die paartjie se huis in Pretoria ontsnap waarna sy die polisie op hul spoor gesit het.

Van Rooyen en Haarhoff het dae later op die vlug geslaan toe hulle die polisie voor hul huis in Capital Park gewaar het.

Hulle het in ‘n motor tot by die Apiesrivierbrug gejaag waar Van Rooyen glo eers Haarhoff en toe homself doodgeskiet het.

Gerhard sê: “Almal het maar hulle eie bedenkinge daaroor. Sommige spreek dit uit en ander kyk net, lees en maak hulle eie afleidings.”

Die selfmoord is nie al wat Gerhard in die opname bespreek nie.

“Soos ek reeds in 2004 gepoog het om voor die direkteur van openbare vervolging (DOV) dit te doen voordat die minister van minister van veiligheid en sekuriteit die saak onbepaald te laat uitstel,” vertel hy verder.

“My versoek was baie eenvoudig – verklaar my pa skuldig of onskuldig.

Niemand wou daardie roete volg nie wat baie vreemd is.”

Gerhard sê dat hy ook versoek het dat die saak teen sy pa nie laat vaar moet word nie, maar weer ondersoek moet word.

“Niemand het daardie roete gevolg nie. Al wanneer daar ondersoek ingestel word is wanneer daar iets in die media gesê word of as ’n sangoma of siener iets gesien het,” sê hy op die opname.

“So deur die jare is derduisende mannekrag en miljoene rande gemors op hierdie baie, baie hartseer en sensitiewe ondersoek wat nie net die kinders se familie se lewens raak nie, maar ook ons familie s’n.”

Gerhard sê dit blyk asof niemand meer aan die saak wil werk nie.

“Polisie offisiere het bedank, daar is nie meer ’n spesiale eenheid of ’n kinderbeskerming-eenheid in die polisie nie. My vraag bly staan: wie ondersoek nou eintlik hierdie saak,” sê hy.

“Is daar nie ’n eenheid wat met die ondersoek moet aangaan nie. Eintlik moet die saak ondersoek word. Die dossier het weggeraak asook die doodsondersoek van my pa en Joey. Die leêrs van die hofsaak is ook vermis – alles raak eenvoudig net weg.”

Gerhard vra dat die saak weer herondersoek word.

“Die probleem is net: Jy kan nie die saak in Suid-Afrika ondersoek nie. Die publiek en polisie het eending voor die oë – Gert van Rooyen. Hulle kyk heeltyd in hom vas,” vertel hy in sy opname.

“Kyk buite die boks. Julle weet nou hy is betrokke of nie betrokke, kom ons soek die kinders. Solank as wat dit aangaan solank sal die saak onopgelos bly.”

Hy stel voor dat buitelandse ondersoekers ingeroep word om te help.

“Maar hierdie speurders moet voorberei om nie in my pa vas te kyk nie, maar om vir die kinders te soek,” sê hy.

“Dis tyd dat die saak oopgevlek word en die regte mense verantwoordlikheid neem vir wat gebeur het.”

Deur: Pretoria Moot Rekord
Joernalis: Nie genoem in artikel

Posted on by — Leave a comment

Dennis Haynes, vermis sedert 1986, word moontlik na 31 jaar opgespoor in Pretoria-Noord

Vermiste Dennis Haynes word na 31 jaar opgespoor in Pretoria-Noord

ʼn Man van Bloemfontein wat in Februarie 1986 spoorloos verdwyn het, is moontlik ná 31 jaar in Pretoria opgespoor.

Dennis Haynes was 22 jaar oud toe hy van Bloemfontein na Roodepoort vertrek het vir ʼn werksgeleentheid. Sy vrou en eenjarige dogtertjie het in Bloemfontein agtergebly.

Dennis het egter nooit teruggekeer nie en sy familie kon hom nie in die hande kry nie. Hy is as vermis by die polisie aangemeld, maar ʼn soektog na hom het niks opgelewer nie.

Desireé Haynes, Dennis se suster, was baie jonk toe haar broer vermis geraak het. Sy het
Vrydag aan Maroela Media gesê dat die familie mettertyd aanvaar het dat hy waarskynlik dood is. “ʼn Vriendin van my het ses weke terug besluit om bietjie te begin krap. Ons het nie gedink ons sal hom lewend opspoor nie, maar ons wou graag weet watndestyds met hom gebeur het,” het Desireé gesê.

Desireé se vriendin het ʼn Facebook-blad begin waarop sy ʼn foto van hom geplaas het en gevra het dat enigiemand wat hom moontlik gesien het met haar kontak maak. ʼn Vrou wat hulp aan haweloses in Pretoria gee, het die foto gesien en haar gekontak. “Die vrou het ʼn foto van ʼn hawelose man in Pretoria op die groep se blad geplaas en gevra of dit moontlik dieselfde man kon wees.

Van ons familielede wat die foto gesien het, was onmiddellik vas oortuig dat dit Dennis is,” het Desireé gesê.

Vandeesweek is Desireé en haar vriendin Pretoria toe om die man te ontmoet en te kyk wat hulle kan wys word. Die man het homself as Francois voorgestel, hoewel hy baie soos ʼn ouer weergawe van Dennis lyk wat 31 jaar gelede vermis geraak het.

Volgens Desireé ly die man aan erge geheueverlies en kon sy agterkom dat hy ʼn mate van breinskade opgedoen het.

Dennis Haynes soos hy gelyk het toe hy vermis geraak het.

“Ek was baie jonk toe Dennis vermis geraak het en kan hom nie baie goed onthou nie. Maar my hele familie herken hom. Almal is vas oortuig die man van Pretoria is Dennis.”

Volgens Desireé het die man haar nie onmiddellik herken nie, maar nadat sy ʼn rukkie met hom gesels het, het hy gesê hy weet sy is sy suster. Hy het ook ʼn foto van hul ma herken.

Vandeesweek het ʼn vrou ook vir Desireé gekontak wat beweer sy het as kind vir Dennis geken. Volgens die vrou was sy 12 jaar oud toe haar ouers begin het om gereeld vir Dennis kos te neem. Sy vertel dat Dennis briewe aan haar geskryf het waarin hy vertel van sy familie en lewe in Bloemfontein. Die vrou het gesê Dennis het die briewe in die styl van ʼn vervolgverhaal geskryf en elke brief het gevolg op die voriges.
“Die vrou sê ongeveer twee jaar nadat sy vir Dennis leer ken het, het hy vir ʼn ruk net verdwyn en toe hy terugkom, het hy homself as Francois voorgestel,” vertel Desireé. “Hy het snymerke en wonde gehad en sy kon sien dat hy in ʼn ongeluk was. Hy het klaarblyklik geheueverlies gehad, want hy kon nie onthou dat sy naam voorheen Dennis was nie. Hy het ook stadiger gepraat, asof hy in ʼn ongeluk was.”

Die vrou het later verhuis en kontak met Dennis, oftewel Francois, verloor. Toe sy egter die foto van hom op Facebook sien, het sy hom dadelik herken en vir Desireé gekontak om haar van die briewe te vertel.

“Die inligting wat sy uit die briewe onthou, is 100% akkurate inligting van Dennis se lewe in Bloemfontein. Dit lyk asof dit regtig hy is,” het Desireé gesê.

“Die vrou het vir my gesê sy het altyd gewonder hoekom sy so goeie geheue het. Nou weet sy dit is omdat die Here geweet het hierdie man gaan sy geheue verloor en sy sal sy storie moet vertel.”

Dennis Haynes se familie glo die man van Pretoria is hul broer wat dekades gelede vermis geraak het.
Desireé het ook gesê ʼn man het Donderdag deur Facebook met hulle kontak gemaak en beweer dat Dennis jare gelede voor die plek waar hy werk in ʼn tref-en-trap-ongeluk betrokke was. Volgens die man het hy vir Dennis hospitaal toe geneem, maar toe ook weer met hom kontak verloor.

Desireé het gesê die familie het DNS-toetse laat doen om te bepaal of Francois wel hul lank verlore broer Dennis is. Hoewel hulle nog op die uitslae wag, is die familie vas oortuig dat hul broer na al die jare gevind is.

“My oom was jare lank in die polisie en hy het vir my gesê destyds het hulle nie regtig baie aandag aan vermiste persoon-sake gegee nie. Daardie tyd het hulle gedink as ʼn volwassene vermis raak, het hy seker uit vrye wil geloop, so daar is nie baie moeite gedoen om die persoon op te spoor nie,” het sy gesê.

Terwyl daar op die uitslae gewag word, bly Dennis by een van Desireé se vriendinne op ʼn plaas buite Theunissen en help hulle hom met tandheelkundige en mediese behandeling.

Bron: Maroela Media