Eers het die Pretoria Boeremark by die Pioniersmuseum in die slag gebly, toe is dit Tant Miertjie se kombuisrestaurant by die Willem Prinsloo-museum wat sy deure moet sluit.
Nou is die nuutste slagoffer van Ditsong Museums van Suid-Afrika glo The Rose Garden-teetuin by die Sammy Marks-museum, wat sy deure ná 25 suksesvolle jare moet sluit.
Volgens Werner Weinbeck (74), eienaar van die teetuin, is dit vir hom vreeslik hartseer om sy deure nou ná al die jare te sluit omdat Ditsong Museums glo besluit het om die teetuin op tender uit te sit.
Werner Weinbeck, eienaar van The Rose Garden-teetuin by die Sammy Marks-museum, moet sy gereelde klante nou ná 25 suksesvolle jare groet.
“Hierdie was my plek. Dis so mooi en rustig hier by die museum. Ek het elke dag met ’n lied in my hart kom werk. Dis die einde van ’n baie goeie hoofstuk in my lewe. Ek is verpletter, maar ek het nie ’n ander keuse as om aan te beweeg nie,” sê Weinbeck.
Benewens die teetuin het Weinbeck ook baie eksklusiewe sesgang-etes in die museum aangebied.
“Die etes was gewild. Ek het ook piekniekmandjies gepak vir mense wat hier wou kom piekniek hou en het gereeld werksfunksies aangebied. Dit is nou als op ’n einde.”
Volgens Alana Bailey, adjunk- uitvoerende hoof van AfriForum, is dit wêreldwyd ontsettend moeilik om finansiering vir erfenisinstansies te kry en is dit hartseer dat suksesvolle museums op hierdie manier skade berokken word.
“As iets soos ’n mark of restaurant by ’n museum is en dit werk, moet jy nie daaraan torring nie. Pretoria is nie soos Kaapstad wat jaarliks honderde duisende toeriste lok nie,” sê Bailey.
As daar suksesvolle markte of restaurante by ’n museum is wat voete lok, hoekom wil jy dan daaraan karring?
“Dit is op die ou end grotendeels tot nadeel van die museum. Hierdie mark en restaurante het baie voete na die museums gelok, wat ontsettend belangrik is vir die oorlewing en sinvolle bestaan van die museums,” sê Baily.
“Tenders is ook nie altyd ’n vreeslike deursigtige proses nie. Ons sal moet kyk hoe dit bestuur word. Ek hoop van harte dit word nie toegeken aan mense wat op die ou end nie die pyp kan rook nie.”
Volgens Johan van Wyk, organiseerder van die Pretoria Boeremark, het Ditsong Museums tot vandag toe nie vir hom terugvoering oor die tenderproses gegee nie.
Dít nadat Ditsong Museums verlede jaar besluit het om die huurkontrak met die Pretoria Boeremark ná 13 jaar te beëindig en om ’n tender uit te sit vir diensverskaffers om die perseel te huur.
“Hulle het my nie eens laat weet dat ek nie die tender gekry het nie. Al wat ek weet is dat die museum nou die R6 000 per week, die bedrag wat ek per week betaal het om die perseel te huur, verloor het.
“Ons is nou ses maande daar weg. Dit beteken die museum het sowat R144 000 aan huurinkomste verloor. Om nie eens te praat van al die mense wat weekliks die mark bygewoon het nie.
“Besoekers aan die mark het dan gesien dat dit ’n oulike perseel is en gereeld kinderpartytjies ens. by die museum kom aanbied oor naweke. Die partytjies het nou opgedroog en so ook die besoekers aan die museum. Doodeenvoudig omdat daar nie meer ’n trekpleister is wat besoekers daarheen lok nie,” sê Van Wyk.
Volgens Lemohang Zincume, woordvoerder van Ditsong Museums Suid-Afrika, was die rede om nuwe kontrakte toe te ken by die Willem Prinsloo-, Pioniers-, en Sammy Marks-museum om oop en mededingende kompetisie te bewerkstellig.
Die Boeremark se huurkontrak met Ditsong het in 2017 verstryk. Die kontrak was uit op tender, maar daar was ’n dispuut tydens die kontrakfase.
Die geleentheid moet ook ten voordeel van die ontwikkeling van klein-, middelslag en mikro-ondernemings (KMMO’s), vroue en gestremde mense wees.
“Die kontrak vir die huidige diensverskaffer by die Sammy Marks-museum het al op 1 Junie 2008 verstryk.
“Van daardie tydperk af het die diensverskaffer op ’n maand-tot-maand-grondslag gewerk. Ditsong is besig met ’n tenderproses,”sê Zincume.
Volgens haar is die huurkontrak van die diensverskaffer by die Willem Prinsloo-museum nie hernu nie, weens kontrakbreuk.
“Die kontrak was uit op tender, maar is weens ’n dispuut nie gefinaliseer nie. Die Boeremark se huurkontrak met Ditsong het in 2017 verstryk. Die kontrak was uit op tender, maar daar was ’n dispuut tydens die kontrakfase.
“Die kontrak sal weer op tender uitgesit word om ’n nuwe diensverskaffer aan te stel,” sê sy.
Foto: Werner Weinbeck, eienaar van The Rose Garden-teetuin by die Sammy Marks-museum, moet sy gereelde klante nou ná 25 suksesvolle jare groet.
Deur: Netwerk 24
