Category: Uncategorized

Navorsers reken net sowat die helfte van Suid-Afrika se jeug tussen die ouderdom van 18 en 29 wat geregistreerde kiesers is, het wel in die vorige drie verkiesings in 2011, 2014 en 2016 uiteindelik ʼn kruisie gaan trek.

Die Instituut vir Sekerheidstudies het kort voor verlede jaar se munisipale verkiesing ʼn verslag bekendgemaak wat toon dat die Suid-Afrikaanse jeug nie noodwendig apaties is nie, maar eintlik eerder ontnugter is deur die land se huidige politieke landskap. Hulle voel dikwels dat verkiesings nie die beste manier is om verandering teweeg te bring nie en dat dit politiek korrup is en net oor selfverryking gaan.

ʼn Groep studente van die Universiteit van Pretoria het egter koppe bymekaar gesit in ʼn poging om die jeug se siening oor politiek te verander. Die studente is tans besig om ʼn gratis aanlyn verkiesingspeletjie te ontwikkel, wat beoog om politiek nie net pret en interessant te maak vir die jeug nie, maar ook die uitwerking van beleidgebaseerde politiek onder die aandag van spelers te bring. Boonop is die speletjie ook eg Suid-Afrikaans.

“Politiek gaan eintlik maar oor die voorstel en inwerkingstelling van beleidsrigtings en natuurlik is dit belangrik vir ʼn party om sy spesifieke beleid aan die breër bevolking te bemark.

“So, omdat jy in hierdie speletjie jou eie verkiesingsveldtog moet bestuur, moet jy ook besluit wat presies jou party gaan sê,” verduidelik Daniel du Plessis, een van die ontwikkelaars van eCivix.

ʼn Speler kan tien van ʼn stel beleidsrigtings kies en dan besluit wat sy of haar posisie ten opsigte van hierdie beleid is – van min of meer streng konserwatief tot baie liberaal.

Die speletjie gebruik egte data van Suid-Afrika se samestelling om te bepaal hoe waarskynlik dit is dat die speler se partybeleidstellings kan werk en hoeveel moeite hulle byvoorbeeld sal moet doen om dit te bemark.

“Dit is ongelukkig so dat Suid-Afrikaners meestal hulle stemme uitbring gebaseer op die geskiedenis van ʼn politieke party, en meestal langs kleurgrens stem. Ons hoop om met eCivix nie net burgerlike betrokkenheid te bevorder nie, maar ook die jeug se grondwetlike kennis te verdiep en te verbeter wanneer hulle die speletjie speel,” het Du Plessis verduidelik.

Die studente hoop hulle kry veral die jeug aan die dink oor partye se beleidsrigtings en hoe hulle as stemgeregtigdes daaroor voel, asook wat hulle glo die uitwerking van die beleidsrigting vir die land se mense en toekoms sal wees.

“Die hele projek word deur onsself, sonder enige winsmotief, gedryf. Dit is bloot ʼn handjievol studente wat hulle liefde vir politiek en tegnologie wil gebruik om ons demokrasie te verdiep,” het Daniël Eloff, wat ook betrokke is by die projek, gesê.

Du Plessis hoop die speletjie sal ook help om kiesers te motiveer om politici nie net aanspreeklik te hou vir wat hulle doen nie, maar die soort beleidsrigting wat hulle voorstaan. “Ons sit in Suid-Afrika in die volgende posisie: As ʼn politikus sy werk doen, ongeag wat sy beleid is, is ons maar min of meer tevrede daarmee. Waarop dit eintlik moet neerkom, is dat ons na ʼn plek moet beweeg waar ons meer oplet na die beleid en rol van die party in die politiek self. Politici moenie kan wegkom deur gonswoorde rond te gooi om kiesers te werf nie, hulle moet wesenlike antwoorde vir Suid-Afrika se kernprobleme kan bied.

“Omdat spelers in eCivix hulle eie kernbeleidsrigting moet kies, wil ons hulle daarvan bewus maak wanneer ʼn politieke party eintlik besig is om die kiesers te mislei.”

Die speletjie sal na verwagting in September beskikbaar gestel word. Die studente beplan ook om verskeie gratis werksessies by skole aan te bied waar hulle die Suid-Afrikaanse verskiesingstelsel aan leerders wil verduidelik en grondwetlike regte bespreek.

• Vir meer inligting besoek eCivix se Facebook-blad.
• Luister gerus ook na Esté Meyer Jansen se gesprek met Daniël Eloff en Daniel du Plessis, twee van die ontwikkelaars van die aanlyn verkiesingspeletjie eCivix. Hulle verduidelik presies hoe die speletjie werk en wat hulle graag daarmee wil bereik.

Deur Jeannette Gnade

’n Voorstel deur die Demokratiese Alliansie in die Oos-Kaap dat ’n loodsprojek begin moet word om die lewensvatbaarheid van plastiekpaaie te toets, is luidkeels deur die ANC afgeskiet. Lede van die land se regerende party kan net nie insien dat daar ’n toekoms bestaan vir paaie wat van herwinbare plastiek gemaak word nie.

Die Oos-Kaap se agterstand in padinfrastruktuur beloop meer as 100 miljard rand en daar is nie genoeg geld in die provinsiale koffers nie. ’n DA-beheerde munisipaliteit in Gauteng het hom intussen bereid verklaar om ’n stuk pad uit plastiek te vervaardig as ’n toetsprojek vir ’n skoner omgewing, die langer lewensduur van paaie en les bes geen slaggate nie.

Plastiekpaaie word reeds in Indië, Nederland en ander plekke in Europa gebruik, en Brittanje toon groot belangstelling vir die tegnologie.

Teer is afkomstig van ru-olie en is dus nie omgewingsvriendelik nie. Asfalt of teer is verantwoordelik vir twee persent van die wêreld se koolstofvrystellings. Dit is ook moeilik om teerpaaie te herstel omdat die teermengsel bo-op, asook die betonlaag daaronder, opgekap moet word en tot groot verkeersontwrigting lei.

Plastiekpaaie word so gebou dat dit ineenskakel en kan stuk-stuk teen minder tyd en koste vervang word. Tog is dié paaie se lewensduur drie keer langer as dié van teerpaaie. Plastiek het verskeie chemiese en fisiese eienskappe en kan gebruik word om paaie meer weerbaar teen uiterste weerstoestande te maak.

’n Nederlandse maatskappy het ’n model voorgestel waarvolgens plastiekpaaie met ʼn spasie binne-in gebou word waar waterpype en elektriese verbindings aangebring kan word. Die oop ruimte kan ook gebruik word vir natuurlike verhitting, wat keer dat paaie toesneeu of sal help dat reënwater vinniger opdroog. Herstelwerk aan die krag- en waterinfrastruktuur in die oop spasies kan vinnig gedoen word omdat net ’n stukkie van die pad verwyder moet word.

’n Belangrike oorweging om van teer na plastiek oor te slaan is die tonne plastiek wat by stortingsterreine beland en vir opvulling gebruik kan word. Dikwels lek besoedelingstowwe in die omliggende grond terwyl plastiekverbranding kan lei tot die vrystelling van kweekhuisgasse soos koolstofdioksied. Mikroplastiese afval is ook besig om die oseane te besoedel.

Modulêre plastiek is makliker om mee te werk as teer. Selfs paaie wat gebou word met ʼn mengsel van plastiek én teer, absorbeer nie water nie, is meer buigsaam, daar ontstaan minder groewe daarin en minder herstelwerk is nodig. Padoppervlaktes is gelyker en aborbeer klank beter.

Ongeveer een miljoen plastieksakke is nodig om ’n stuk plastiekpad van een kilometer te bou, en die boutempo is 70 persent vinniger as die aanlê van ’n teerpad. Is dit nie tyd om kreatief te dink nie?

• Hierdie nuuskommentaar word deur Pretoria FM verskaf. Luister daagliks na Klankkoerant op Pretoria FM vir die jongste nuuskommentaar

[promosie-artikel]

ʼn Kaleidoskoop is ʼn outydse speelding wat mooi patrone en kleure maak sodra jy dit op ʼn ligbron rig en daardeur kyk.

Dit is ook die naam van een van ons land se talentvolste groepe. “Ons vind inspirasie deur ons oë op Jesus – óns ligbron – te rig. Só hoop ons om ons positiewe, kleurvolle uitkyk op die lewe, liefde en menswees in ons musiek en lirieke te weerspieël – ‘n broodnodige boodskap van hoop,” sê Anique en Jouba van Kaleidsoskoop.

Kaleidoskoop is ‘n Afrikaanse musiekgroep wat hul musiek uit ’n positiewe, dog realistiese oogpunt komponeer. Met kleurryke harmonieë en ‘n verskeidenheid van akoestiese instrumente neem Kaleidoskoop ’n hele spektrum van musiekvorme aan. Hulle laat jou deur hul musiek anders na die kleure van die lewe, liefde en menswees kyk.

Die groep het ook al verskeie albums die lig laat sien. Hulle nuutste album, Gunsteling Seisoen, is Maart bekendgestel en die snit “Webreek” (musiekvideo onderaan die artikel) het op verskeie trefferparades gepryk.

Kom vier fees saam met Kaleidoskoop by die Lente-vertoning op 1 September 2017

Kom vier LENTEDAG saam met Kaleidoskoop en hul volle 12-stuk-orkes by Lewende Woord se ouditorium in Brummeria! Oudergewoonte sal daar ‘n magiese atmosfeer geskep word met baie liggies en vlaggies. Terselfdertyd sal jou ore bederf word met die akoestiese klanke van kitaar, klavier, mandolien, banjo, ukuleles, trekklavier, perkussie, viole en saksofone asook die strelende harmonieë van hul stemme. Bring die hele gesin en kom geniet allerhande lekkernye soos wafels, roomys, worsrolletjies, melkskommels en goeie koffie vanaf 18:30! Odette Will het selfs aangebied om die dames se hare op te dollie voordat hulle die fotohoekie betree, waar almal ook die aand hul “vintage” lentedagklere kan vasvang.

Vir meer inligting besoek gerus Kaleidoskoop se webblad.

Kaleidoskoop is ook te sien by Maroela Media se Buitebioskoop op 16 September.

[This post contains video, click to play]

Thomas Dreyer en sy vrou, Retha, is besig met ʼn reis (met ʼn baie beperkte begroting) deur Europa. Hulle is oorspronklik van Pretoria.

Deur Thomas Dreyer

Ons staan voor die reusagtige St Petruskatedraal in Rome. Op die plein stap honderde besoekers rond. Toergroepe loop soos skape agter hulle toerleiers aan. Rondom ons staan 285 reuse marmerkolomme vier-vier langs mekaar in ‘n semi-sirkel.

Bo-op die kolomme se dak staan 56 beelde van heiliges wat stilswyend toekyk. Voor die kerk is twee reusebeelde van die apostels Petrus en Paulus.

Agter hulle, bo-op die katedraal se dak, in ‘n ry, is beelde van Christus, die apostels en Johannes die Doper wat goedkeurend toekyk. Deur die eeue was dit een van die Katolieke Kerk se boustene: “Beelde is die boeke vir die leke.”

Die St Petruskatedraal is gebou deur en tot ere van Pontifex Maximus (pous) Paulus die Vyfde. Voor op die kerk staan in reuse Latynse letters dat hy die prins van die apostels, ‘n Romein en die hoof Pontifex is.

Binne die kerk, wat jou oorweldig deur sy grootte en massiewe beelde van apostels, pouse en heiliges, staan in sewe voet groot letters onder die indrukwekkende koepel van Michelangelo, dat die Pontifex die verpersoonliking van die apostel Petrus is. Hy is die middelpunt van al die glorie, die goud, die kunswerke en versierings, die gekruisigde Jesus, die opgestane Maria en al die heiliges wat hier begrawe is en vereer word.

In antieke Rome was die “Pontifex Maximus” die hoof van ‘n groep heidense priesters genoem “pontifices”. Hulle was toesighouers oor die heidense priesters wat in die tempels die Romeinse afgode, Jupiter en sy vrou Juno, Neptunus, Mars, Venus, Minerva en vele ander, gedien het. In die tempels is beelde vir die afgode opgerig en het die priesters elke dag vir hulle offers gebring.

Met die Edik van Milaan in 313 n.C. het Keiser Konstantyn die Christelike godsdiens gewettig na eeue van vervolging. Skielik was dit voordelig om ‘n Christen te wees en het die heidense priesters ‘n Christelike kruis op hulle kleed vasgewerk. In die tempels het hulle die heidense beelde vervang met Christelike beelde. Partykeer het hulle sommer net die beeld se naam verander.

Tempels het “kerke” geword. Die “Pontifex Maximus” het die pous geword en die “pontifices” die kardinale. Vir sy kerklike gesag en posisie het die Pontifex Maximus bloot verklaar dat Petrus die eerste Pont Max in Rome was en dat hy Petrus se opvolger is.

Die heidense offers het hulle met die “mass” vervang. Die Pont Max en die “pontifices” het bloot verklaar dat die brood en wyn met die nagmaal werklik in Jesus se liggaam en bloed verander. Soos in antieke Rome bring die priesters elke dag offers in die tempels met die rituele “mass”.

Stap jy die St Petruskatedraal, of enige ander Roomse kerk in, is jy omring deur Christelike beelde en reusagtige skilderye, die “boeke vir die leke”. Die boodskap is orals dieselfde: die pous is Pont Max, Jesus is gekruisig en Maria lewe.

Jesus word oorheersend uitgebeeld as ‘n klein babatjie, die gekruisigde of dooie op sy ma se skoot. Maria is die pragtige, jong, lewende, opgestane moeder en gekroonde in die hemel. In 1854 verklaar die Pont Max dat Maria sondeloos gebore is en in 1950 dat sy na die hemel opgevaar het.

Heiliges, vernames en rykes uit die kerk se geskiedenis word dikwels saam met Maria uitgebeeld. Of by die kruisiging van Jesus. Of dat hulle by was toe Maria opgestaan het uit die dood, opgevaar het na die hemel waar sy deur Jesus gekroon is. Jupiter se Juno.

Daagliks stap leke wêreldwyd by hierdie tempels in en gaan bid by die beelde en grafte van die heiliges, vernames, en rykes. Hulle raak daaraan, kniel daarvoor en bring “offerte”.

En hulle sien en verstaan die boodskap wat indrukwekkend en oorweldigend gebring word baie duidelik: die pous is Pont Max, Jesus is gekruisig en Maria lewe.

Lees alle vorige rubrieke oor Thomas en Retha Dreyer op Maroela Media.

AfriForum het Woensdag ’n hersieningsaansoek by die Pretoria-hooggeregshof ingedien waarin die hof gevra word om Maite Nkoana-Mashabane, minister van internasionale betrekkinge en samewerking, se besluit om diplomatieke immuniteit aan die Zimbabwiese presidentsvrou, Grace Mugabe, toe te staan, ter syde te stel.

Willie Spies, AfriForum se regsverteenwoordiger, het gesê volgens die eedsverklaring van Gabriella Engels, die vrou wat glo deur Mugabe in ’n hotelkamer in Sandton in Johannesburg aangerand is, het die minister artikel 7(2) van die Wet op Diplomatieke Immuniteit en Voorregte verkeerd vertolk en het Nkoana-Mashabane nie oor die bevoegdheid beskik om immuniteit aan Mugabe toe te staan nie. Sy het ook nagelaat om in gedagte te hou dat die beweerde misdaad wat deur haar gepleeg is, neerkom op ’n ernstige misdaad soos in die wet uiteengesit.

Engels voer ook in haar eedsverklaring aan dat die Wet om Immuniteit van Buitelandse Moondhede (van 1981) die verlening van immuniteit aan staatshoofde wat hulle skuldig maak aan die dood of beserings van mense in Suid-Afrika, uitdruklik uitsluit.

“Indien staatshoofde nie eens oor immuniteit in sulke gevalle beskik nie, is daar geen manier dat hul gades of families dit kan kry nie,” het Spies gesê.

Die hofaansoek behoort binne die volgende vier tot vyf maande in die Pretoriase hooggeregshof geargumenteer te word.

Mugabe het Sondag na Zimbabwe teruggekeer ten spyte van talle eise dat sy vervolg moet word nadat sy Engels glo aangerand het.

Lees alle vorige berigte oor Grace Mugabe op Maroela Media.

Die borgtogaansoek van drie van die vyf mans wat in hegtenis geneem is in verband met die sogenaamde KFC-aanranding van Jacob Sono en sy vrou, Dudu Sono, is Woensdag in die Pretoria-Noord-landdroshof uitgestel.

Stephan Nel (39), Dicky Junior van Rooyen (21) en Joshua Scholtz (21) se borgtogaansoek is Woensdag weer in die hof hervat. Ockert Muller (20) is reeds vroeër op borgtog van R5 000 vrygelaat en Marius Harding (23) het sy aansoek om borgtog laat vaar weens ’n uitstaande lasbrief vir diefstal in ʼn onverwante saak in KwaZulu-Natal.

Die hof het voorleggings van Nel, Van Rooyen en Scholtz se verdediging aangehoor, waarna die saak tot Vrydag uitgestel is vir slotbetoë van die staatsaanklaer, Ronnie Sibanda, wat die aansoek teenstaan.

Landdros Motlhoki Rapulana sal na verwagting daarna bekend maak wanneer sy uitspraak in die borgtogaansoek sal lewer. Sy het reeds aangedui dat sy die besluit goed moet deurdink. Die vier bly in aanhouding.

Konst. William Tladi, ondersoekbeampte van die Sinoville-polisie, het Woensdag in die hof getuig ʼn gewelddadige openbare oproer sal moontlik volg indien borgtog aan die mans toegestaan word.

Lede van die ANC Vroueliga het sedert die begin van die verhoorproses buite die hof betoog. Tydens Woensdag se verhoor was lede van die Black First Land First (BLF)-groep ook in die hof.

“Is hierdie mense hier om morele ondersteuning aan die beskuldigdes te bied? Sommige van hulle dra plakkate wat lees ‘geen borgtog’. Het jy hulle gesien?” het Sibanda ʼn vraag aan Tladi gestel. “Jy het gesien wat buite [die hof] gebeur. Wat dink jy sal gebeur as die beskuldigdes borgtog toegestaan word?”

Tladi het geantwoord: “Daar kan gevegte ontstaan.” Hy het ook bygevoeg dat die lewe van die beskuldigdes moontlik in gevaar kan wees.

Die burgerregte-organisasie AfriForum het vroeër Woensdag buite die Pretoria-Noordse landdroshof betoog teen sogenaamde dubbele standaarde waarmee die organisasie sê rasvoorvalle in Suid-Afrika hanteer word. Die organisasie het gesê hy het besluit om na dié landdroshof op te ruk omdat “wit-op-swart-aanvalle deurlopend aan die groot klok gehang word, terwyl swart-op-wit-aanvalle grootliks geïgnoreer word”.

Lees alle vorige berigte oor die KFC-voorval op Maroela Media.

Die Pretoria-Noord-landdroshof het Woensdagmiddag gehoor dat geweld of erge konflik moontlik kan uitbreek indien die borgtogaansoek van drie van die vyf beskuldigdes in die sogenaamde KFC-aanrandingsaak suksesvol sou wees.

Stephan Nel (39), Dicky Junior van Rooyen (21) en Joshua Scholtz (21) se borgtogaansoek is Woensdag weer in die hof hervat. Ockert Muller (20) is reeds vroeër op borgtog vrygelaat en Marius Harding (23) het sy aansoek om borgtog laat vaar weens ’n uitstaande lasbrief vir diefstal.

Adv. Ronnie Sibanda, die staatsaanklaer in die saak, het aan konst. William Tladi, ondersoekbeampte van die Sinoville-polisie, gesê die groepe mense wat elke keer betoog wanneer die saak in die hof aangehoor word, is nié daar is om die beskuldigdes te ondersteun nie, maar om hul misnoeë in moontlike borgtog uit te spreek. Hy het gesê dat die betogers moontlik geweld of konflik kan veroorsaak indien borgtog aan die mans toegestaan word.

Lede van die ANC Vroueliga het sedert die begin van die verhoorproses buite die hof betoog. Tydens Woensdag se verhoor was lede van die Black First Land First (BLF)-groep ook in die hof.

“Is hierdie mense hier om morele ondersteuning aan die beskuldigdes te bied? Sommige van hulle dra plakkate wat lees ‘geen borgtog’. Het jy hulle gesien?” het Sibanda ʼn vraag aan Tladi gestel. “Jy het gesien wat buite [die hof] gebeur. Wat dink jy sal gebeur as die beskuldigdes borgtog toegestaan word?”

Tladi het geantwoord: “Daar kan gevegte ontstaan.” Hy het ook bygevoeg dat die lewe van die beskuldigdes moontlik in gevaar kan wees.

Tshidiso Tsimong, adjunk-sekretaris-generaal van die BLF, het gesê “enigiets kan gebeur” indien die beskuldigdes Woensdag borgtog sou kry. “Daar is baie dinge wat kan gebeur. As lede van die gemeenskap én BLF is ons baie ontsteld oor die manier waarop hulle hulself gedra het. Hulle mag dalk verdwyn, hulle kan Europa besoek of soos dinge nou lyk, mag hulle dalk die hemel besoek. Ons kan nie in detail sê wat sal gebeur nie,” het Tsimong gesê.

“Ons vra die landdroshof om dienooreenkomstig op te tree en nie borgtog aan die verdagtes toe te staan nie. Ons sien dit nie as die regte ding om te doen nie. Hulle moes vorendag kom met ʼn verdediging om te wys dat hulle nie ʼn bedreiging vir die samelewing is nie, maar hulle het nie daarin geslaag nie.”

Ao. Ravi Vengetsamy Naidoo, bevelvoerder van speurders by die Sinoville-polisiestasie, het vroeër ook aangevoer die beskuldigdes moet ter wille van die veiligheid van die egpaar wat hulle aangekla het, nie op borgtog vrygelaat word nie.

Die burgerregte-organisasie AfriForum het vroeër Woensdag buite die Pretoria-Noordse landdroshof betoog teen sogenaamde dubbele standaarde waarmee die organisasie sê rasvoorvalle in Suid-Afrika hanteer word. Die organisasie het gesê hy het besluit om na dié landdroshof op te ruk omdat “wit-op-swart-aanvalle deurlopend aan die groot klok gehang word, terwyl swart-op-wit-aanvalle grootliks geïgnoreer word”.

Die hofverrigtinge duur voort.

Lees alle vorige berigte oor die KFC-voorval op Maroela Media.