Solly Msimanga, burgemeester van Tshwane, moes Maandag uit Soshanguve, noord van Pretoria, vergesel word nadat gemeenskapslede hom verjaag het waar vyf kinders dood is toe ʼn paneel van ʼn munisipale ligmas losgekom het.
Maroela Media het vroeër berig vyf kinders, tussen ses en 12 jaar oud, is dood toe hulle by Apollo-lig, net buite die Bopapes se huis, gespeel het. Die swaar metaalring wat die hoë lig ondersteun, het losgekom en vier kinders is op slag dood. Twee kinders is na ʼn hospitaal geneem, waar een van hulle by George Mukhari-hospitaal gesterf het. Een van die kinders is nie beseer nie. Twee van die kinders was nefies uit die Bopape-familie.
Msimanga wou ʼn besoek aflê aan die treurende gesinne, het sy waarnemende woordvoerder, Lindela Mashigo, gesê. Toe Msimanga en ʼn span afgevaardigdes van die munisipaliteit egter Maandagoggend by Block X-gemeenskapsaal in Soshanguve opdaag, het lede van die plaaslike sakeforum hul “ongemak” uitgespreek met sy teenwoordigheid.
“In die lig van die tragiese gebeure en die rou emosie, het die burgemeester besluit om nie in gesprek te tree met die groep mense nie, maar eerder na die families te gaan,” het Mashigo verduidelik. “ʼn Groep mense het die burgemeester weer voorgekeer toe hy by een van die families opgedaag het. Dit is duidelik dat die groep mense ʼn politieke agenda wil dryf in hierdie tyd waar politiek die laaste ding in die burgemeester se gedagtes is. Dit is baie jammer dat die mense, wat as gemeenskapsleiers beskou word, eerder hul eie politieke belang wil dryf as om die families se gevoelens in ag te neem.”
Msimanga se kantoor blameer die ANC, die opposisie in Tshwane, vir die chaos. “Dit is nou baie duidelik dat die ANC in Tshwane nie eers meer voorgee om vir mense om te gee nie, en hulle gebruik nou mense se pyn om ʼn politieke agenda te dryf. Hierdie tipe gedrag word ten sterkste veroordeel.”
Sommige inwoners het gekla dat hulle met rubberkoeëls geskiet is, deur lede van die Tshwane-metropolisie, wat Msimanga beskerm. Sommige van die inwoners het glo doppies van die rubberkoeëls gehou.
Wykraadslid Phumzile Hlatshwayo sê die gemeenskap soek al sedert Saterdag bloed. “Dit was baie sleg toe ek Saterdagmiddag daar aangekom het. Die gemeenskap is baie sensitief. hulle het intussen bande op die pad aan die brand gesteek. Mens sien die frustrasie van die gemeenskap. Hulle is kwaad omdat hulle dienste verwaarloos word. Daar is ʼn hele aantal van dié ligmaste wat ook oop is soos die een wat op die kinders geval het. Ons versoek dienslewering en instandhouding,” het Hlatshwayo gesê. “Ons hoor daar is nie geld nie, maar as mens na plekke soos Waterkloof gaan, dan sien mens nie dieselfde probleme nie. Maar in die townships word die begroting beperk. Die prioriteit is die voorstede.”
Mashigo het vroeër gesê dit wil voorkom of iemand met die kabels van die ligmas gepeuter het, vermoedelik in ʼn poging om dit te steel. “Dit is hartseer dat diewe se vandalisme van elektriese kabels die lewens van onskuldige kinders geëis het,” Mashigo bygevoeg.
Deur: Maroela Media
