Category: SA-nuus

Foto: Verskaf

“Sinkgate en kabeldiefstal is die grootste probleme in my wyk en gister het albei ons tegelyk getref.”

Dit is die woorde van rdl. Ina Strydom nadat sy en ʼn span werkers Dinsdag reg deur die dag moes spook om naby ʼn nuutgevormde sinkgat in Thaba Tshwane (Voortrekkerhoogte) kragkabels te herstel wat gesteel is.

Strydom het Woensdag aan Maroela Media gesê vier hoofstroomkragkabels is in die vroeë oggendure in ʼn afgeleë en digbebosde gebied tussen Thaba Tshwane en Valhalla in Centurion gesteel.

“Die krag na Thaba Tshwane, 1 Militêre hospitaal en die Atteridgeville-gevangenis het tussen 02:00 en 03:00 afgegaan. Nagenoeg 50 m van elke draad, 200 m in totaal, is afgesaag en gesteel om verkoop te word,” het sy gesê.

Strydom het gesê toe sy en ʼn kontrakteur van die Tshwane-metro gaan ondersoek instel het om vas te stel wat die kragonderbreking veroorsaak het, het hulle die nuutgevormde sinkgat opgemerk.

“Die sinkgat is sowat 100 m in deursnee en die kante daarvan is direk onder die plek waar die kabels gesteel is. Die diewe het hul lewens gewaag om dit daar af te saag want die grond kon enige tyd verder ingegee het.”

Strydom het gesê ʼn span werkers moes reg deur die dag en aand werk om nuwe kragkabels aan te lê en dit moes om die sinkgat herlei word.

“Die sinkgat het veroorsaak dat herstelwerk langer as gewoonlik geduur het omdat ons met die swaar toerusting dit nie naby die gat kon waag nie. Maar teen Woensdagoggend was kragtoevoer na die grootste gedeelte van Thaba Tshwane, die hospitaal en die gevangenis herstel.”

Volgens Strydom word die skade van die diefstal alleen om R300 000 beraam. Die sinkgat is een van vele in Thaba Tshwane. Dit het op eiendom van die militêre basis voorgekom en hou nie ʼn onmiddellike gevaar vir die publiek in nie.

Bohlale Mokoena. Foto: Best Care-ambulansdienste

Die eienaar van die Zambibush Resort in die noorde van Pretoria waar ʼn sewejarige seun se liggaam Sondag in een van die swembaddens gevind is, het Woensdag gesê “dit is ʼn raaisel” dat sy liggaam nie vroeër gevind is nie.

Bruwer Nel, eienaar van Zambibush, het in ʼn verklaring gesê die tragiese dood van Bohlale Mokoena die afgelope naweek is vir al die personeel by die oord ʼn groot skok. “Ons is saam met sy familie verskriklik hartseer oor die tragedie en het ná die ontdekking van Bohlale se liggaam alles in ons vermoë gedoen om die gesin te ondersteun,” het Nel gesê.

Maroela Media het vroeër berig Bohlale het omstreeks 16:00 Saterdag by die oord vermis geraak. Volgens sy ma het hy “binne minute” net verdwyn. Personeellede van die oord en lede van die publiek het ure lank na Bohlale gesoek, maar sonder enige sukses.

Nel het gesê daar was skole wat die naweek die oord besoek het en hulle is genader om vas te stel of Bohlale nie dalk op ʼn manier saam met een van die groepe in ’n bus beland het nie. “Die swembaddens, visdamme en die veld rondom die oord is deursoek,” het hy gesê.

Zambibush Resort in Pretoria. Foto: http://zambibush.co.za

Die plaaslike gemeenskapspolisiëringforum (GPF), Best Care-ambulansdienste en die Pretoria-nooddienste is later ook ontbied om met die soektog te help.

Bohlale se liggaam is Sondagoggend deur ʼn bestuurder van Zambibush in een van die swembaddens gevind. “Dit is vir ons ʼn raaisel dat Bohlale se liggaam nie vroeër gevind is nie, aangesien die swembad waarin hy gevind is, se water helder is,” het Nel gesê.

“Zambibush Resort hoop dat ’n polisieondersoek lig sal werp op die gebeure wat tot die tragiese dood van Bohlale gelei het. Ons sal alles in ons vermoë doen om die oorsaak van hierdie voorval vas te stel en te verseker dat families steeds veilig by die oord kan ontspan. Daarom gee ons ook ons volle samewerking aan die polisie om te probeer vasstel wat tot die voorval gelei het.”

Beamptes by die oord tydens die soektog. Foto: Best Care-ambulansdienste

Talle mense het vandeesweek op Zambibush se amptelike Facebook-blad dit bevraagteken hoe dit moontlik is dat Bohlale se liggaam eers die volgende dag gevind is indien daar in al die swembaddens gesoek is. Ander het dit bevraagteken of daar lewensredders aan diens was om ʼn ogie oor die swembaddens te hou en hoekom die polisie se hulp nie onmiddellik ingeroep is toe die seun vermis geraak het nie.

Nel het gesê die oord het wel voltydse glybaan- en swembadtoesighouers, noodhulppersoneel en veiligheidsmaatreëls soos dit deur aanspreeklikheidsversekering vereis word.

Kapt. Mavela Masondo, woordvoerder van die polisie, het aan Maroela Media gesê die polisie is steeds besig met ʼn geregtelike doodsondersoek na die saak.