Die voorsitter van die Boere-Afrikanervolksraad en leier van die HNP, mnr Andries Breytenbach, sê in ‘n dokument aan die Parlementêre ad hoc-komitee wat gemoeid is met die wysiging van artikel 25 van die Suid-Afrikaanse grondwet, ten einde onteiening van die burgery se eiendom, sonder vergoeding moontlik te maak, dat onteiening van eiendom sonder vergoeding ‘n kriminele daad van diefstal is.
Mnr Breytenbach het in ‘n skerp bewoorde voorlegging aan die Parlementêre komitee geskryf dat die wysiging van artikel 25 immoreel, illegitiem en die misbruik van mag is. Hy sê in sy voorlegging dat die voorgestelde wetgewing om artikel 25 van die huidige grondwet te wysig en enige poging om onteiening sonder vergoeding te “wettig”, in sy geheel verwerp word.
Die Afrikanervolk sal sodanige wetgewing nie as legitieme wetgewing erken nie, en sal met die middele tot hulle beskikking hulle teen die
diefstal van hulle eiendom verweer en sal nie die eienaarskap of besitreg van persone of instansies aan wie sodanig gesteelde eiendom gegee of verkoop word, erken nie.
Mnr Breytenbach sê wanneer die geleentheid en omstandighede daarvoor ontstaan, sal die ontneming van sulke eiendom omgekeer word en sal die eiendom aan hul regmatige eienaars teruggegee word. Die koste van sodanig omkering en skade deur die regmatige eienaars deur sodanige ontneming gely, sal van diegene wat daarvoor verantwoordelik was en/of daaraan meegedoen het, verhaal word.
Lede van ʼn wetgewende vergadering wat sodanige wetgewing ondersteun, en die president wat dit goedkeur, sal, wanneer die geleentheid en omstandighede hulle daartoe leen, kollektief en individueel voor die gereg tot verantwoording geroep word, sê mnr Breytenbach.
Mnr Breytenbach se volledige verklaring in Engels kan hier afgelaai word:
Commentary of the Volksraad (BAV)
