Category: Afrikaanse Musiek

Posted on by — Leave a comment

Pretoria FM maak planne bekend om nuwe Afrikaanse-musiek toekenningsgeleentheid te loods

Pretoria FM maak planne bekend om nuwe Afrikaanse-musiek toekenningsgeleentheid te loods

Die Afrikaanse gemeenskapstasie, Pretoria FM, het pas planne bekendgemaak om ‘n nuwe Afrikaanse-musiek toekenningsgeleentheid van stapel te stuur.

Die uitvoerende Hoof van Pretoria FM, Mnr Hennie Koortzen het in ‘n verklaring gesê die radiostasie het groot waardering vir die werk van alle Afrikaanse liedjieskrywers en sangers, wat deurgaans werk van hoë gehalte lewer en wil verseker dat hulle die nodige erkenning in die musiekbedryf ontvang.

“Ons is verder van mening dat sulke toekennings in alle opsigte deursigtig en geloofwaardig moet wees en dat die gehalte van musiek en lirieke die enigste kriteria moet wees waarop beoordeling moet geskied”, het Koortzen bygevoeg.

Pretoria FM kondig dus met trots aan dat die stasie se bestuur besluit het om ‘n splinternuwe glansgeleentheid te skep waartydens Afrikaanse musiek en kunstenaars van gehalte, beloon kan word vir die bydrae wat hulle tot musiek en die kunste in sy geheel lewer.

Die nuwe toekenningsgeleentheid beloof om ‘n skouspel van hoogstaande gehalte te wees en sal tydens die tweede helfte van die jaar in Pretoria in samewerking met belangrike rolspelers in die bedryf aangebied word.

Meer besonderhede, soos die naam van die nuwe toekenningsgeleentheid, die beoordelaars en kategorieë, sal binnekort in die media en op sosiale platforms bekend gemaak sal word.

Hierdie berig weerspieël nie noodwendig die mening van Pretoria.ws nie.

Posted on by — Leave a comment

Gekaapte Radio Pretoria val uit die bus tydens Liberty Toekennings

Gekaapte Radio Pretoria val uit die bus tydens Liberty Toekennings

Met die “Liberty Toekennings” vir radiostasies het die gekaapte Radio Pretoria, wat Pretoria FM geword het, totaal uit die bus geval wat ’n paar dinge bewys.

Ten eerste is dit nie meer ’n volksgerigte radiostasie nie, daarvan getuig die swak reaksie om vir die patetiese draadloos te stem.

Dan is dit verstaanbaar, want die misleiding (volgens luisteraars), asof dit ’n Afrikaanse sender is, word nie deur mense geglo nie, want te veel Engels op hulle kamtige “koerant” en die sieklike gebruik om die sender te oordonder met volksvreemde musiek, het die getroue luisteraars van weleer verjaag.

Die slegte aanbieding van onkundige omroepers het die seel op alles gesit, en daarom is geen afdeling of kategorie aan die ellendige stasie toegeken as wenners nie – want wie stem vir verloorders.

Die radiostasie se agteruitgang het begin toe Buys en sy meelopers die radio gekaap het, en daarna begin het om die eens gewilde radiostasies in die grond in te bestuur met hulle benaderings wat weg is van volks-gerigtheid omdat hulle kamma net Afrikaans wil wes (met Engelse musiek).

Die opvallende is dat die personeel wat aanhoudend gepleit het dat mense op die internet vir hulle stasie moet stem, nou swyg soos die graf, want hulle het kwalik in aanmerking gekom vir ’n moontlike wn.

Miskien sal die stasie nou nog verder na links beweeg in ’n wanhoopspoging om stemme te werf vir ’n volgende rondte.

Gelukkig is daar ander maniere om musiek en inligting te bekom as om met die patetiese radio opgeskeep te sit.

L C de Klerk
Deur: Die Vryburger
Hierdie berig weerspieël nie noodwendig die mening van SAUK-nuus nie.

Posted on by — Leave a comment

Kopiereg-werkswinkel in Pretoria: 24 Februarie 2018

Kopiereg-werkswinkel in Pretoria: 24 Februarie 2018

Onthou die datum: Saterdag 24 Februarie 2018! Dit is die dag waarop ’n belangrike kopiereg-werkswinkel in Pretoria gehou sal word vir outeurs, kunstenaars, musikante, filmvervaardigers en die bedrywe wat in hul werk belê.

Die parlement hersien tans Suid-Afrika se kopieregwetgewing. Die Kopieregalliansie, ’n groepering van rolspelers in die skeppende bedrywe, is in reaksie op die Wysigingswetsontwerp op Outeursreg gestig en is tans besig om openbare bewustheid oor relevante onderwerpe te skep. ’n Spesifieke fokus is die wyse waarop die wetsontwerp skrywers, kunstenaars, musikante, filmvervaardigers en die bedrywe wat in hul werk belê, sal beïnvloed.

Die parlementêre portefeuljekomitee beplan om in Maart beraadslaging oor die wetsontwerp te hervat. Die Kopieregalliansie reël ’n geleentheid op 24 Februarie 2018 in afwagting van hierdie vergaderings. Die geleentheid sal vanaf 14:00 tot ongeveer 18:00 by die Universiteit van Pretoria se Musaionteater plaasvind.

Die program sal bestaan uit ’n beleidsrede, gevolg deur vier segmente van 40 minute elk, met die geleentheid vir vrae uit die gehoor en met kunstenaarsoptredes tussenin. Die vier segmente sal fokus op:

die boekuitgewersbedryf
die musiekbedryf
die rolprentbedryf en
die regspraktyk.
Die Kopieregalliansie bestaan uit / word ondersteun deur die volgende verenigings en organisasies:

CAPASSO – Composers Authors and Publishers Association
DALRO – Dramatic Artistic and Literary Rights Organisation
MASA – Musicians Association of South Africa
PASA – Publishers Association of South Africa
RiSA – Recording Industry of South Africa
SAMPRA – South African Music Performers Rights Association
SAMRO – Southern African Music Rights Organisation
MPA SA – Music Publishers’ Association of South Africa
IBFC – Independent Black Filmmakers Collective (IBFC)
SAIIPL – The South African Institute of Intellectual Property Law
Die Kopieregalliansie beoog om die volgende partye na die geleentheid van 24 Februarie te nooi:

die Minister van Handel en Nywerheid, lede van die portefeuljekomitee en verteenwoordigers van die regering;
prominente persone binne die skeppende en uitvoerende kunsbedrywe;
verteenwoordigers van die Kopieregalliansie se lede-organisasies;
organisasies wat ander skeppende bedrywe verteenwoordig, soos skrywersverenigings; en
verteenwoordigers van die pers
’n Uitnodiging sal binnekort versprei word, maar hou asseblief die datum oop!